التيفال فيه سم قاتل

الى كل ست بيت فى مصر – التيفال فيه سم قاتل

تقريبا مافيش بيت فى مصر مافيهوش حلل تيفال او صوانى تيفال وتقريبا فيه بيوت بتستخدمه بصفه يوميه سواء فى البيض المقلى أو تحمير الفراخ او اللحوم وغيرها من الاستخدامات اليوميه

ممتاز  آمال فين المشكله ؟ المشكله ان مع الاستخدام المتكرر والطويل أو لو المصنع اللى انتج الأدوات دى عملها رديئه او عمل عليها عرض ونزلها رخيصه فبتكون طبقة التيفال رقيقه وبالتالى بتتقشر بسرعه واجزاء من المعدن الأصلى بتبان ده سواء من كتر الاستعمال او من رداءة الإنتاج وده خطر جدا جدا لان خامة التيفلون اللى بيصنع منها التيفال دى ماده كيمائيه خطيره جدا جدا لو تناولها الإنسان وبتسبب أنواع كتيير جدا من السرطان ربنا يحفظنا جميعا

طيب هل عندنا أدله على هذا الإدعاء اللى ممكن يأثر على مصنعيين كتيير فى مصر آه :

اصل الموضوع ان الدبابات كانت بتتعرض للميه والثلوج فى الحرب العالميه وبتصدى الشركات الامريكيه بحثت فى الموضوع ووصلوا لماده تمنع صدأ الحديد طلوا بها الدبابات ولما انتهت الحرب فكرت شركة دوبونت فى ازاى يستخدموا الماده دى فى الحياه المدنيه ووصلوا لاختراع مادة التيفلون اللى هى التيفال وبعد ماطرحت المنتجات فى السوق ونتيجة تداعيات كتيير حصلت لسكان المنطقه اللى فيها مصنع دوبونت اللى بيصنع الماده دى فى فرجينيا الغربيه فيه محامى بحث الموضوع واتضح ان الماده دى ومخلفاتها كانت السبب فى مرض كتيير من السكان اللى تعرضوا ليها سواء عمال المصنع او الناس اللى كانوا مجاورين لأماكن دفن النفايات او الللى شربوا ميه ملوثه بمخلفات الماده دى – الامراض ماكانتش حاجه بسيطه كانت للاسف مجموعه متنوعه من السرطان وتشوهات للمواليد وفى النهاية نجح محامى انه يقاضى الشركه ويمنعها من دفن المواد دى فى الاماكن دى مره تانيه ويحصل على تعويضات بالملايين للضحايا

السؤال بقى دوبونت بتدفن النفايات دى ومخلفات التيفلون دلوقت فين ؟ الله أعلم بس لازم بتدفنها فى النهاية آه مش فى أمريكا طيب فين ؟ سؤال مهم

علشان ما يحصلش خلط بين المواد اللى كانت بتدفن وبين التيفال اللى احنا بنستعمله وهل هو آمن ولا لأ؟

المفروض انه آمن لو مش بيقشر ويتآكل وبالتالى يطلع فى الاكل اللى احنا بنأكله فلو لاحظت اى ست بيت ان اى حله او مقلايه او صينيه تيفال عندها اتقشرت ترميها فورا وبلاش استخسار وبلاش تشتروا انواع رديئه وغير معروفه او عليها عروض غير منطقيه

طبعا احنا لا بنبيع تيفال ولا لنا علاقه بيه آمال بنكتب فى الموضوع ده ليه ؟ علشان احنا لينا علاقة بصحة متابعينا ودى اللى تهمنا

اللى عايز يتأكد من المعلومات دى ومدى دقتها يشوف الآتى : فيلم Dark Waters  ده فيلم بيحكى حكاية المحامى اللى رفع القضيه وكسبها ضد دوبونت وده ملخص عن الفيلم وابطاله هنا Dark Waters (2019) – IMDb   الفيلم إنتاج 2019

ده مقال اتنشر فى النيويورك تايمز الصحيفه الامريكيه الرصينه والشهيره بعنوان المحامى الذى اصبح اسوأ كوابيس دوبونت :

The Lawyer Who Became DuPont’s Worst Nightmare – The New York Times (nytimes.com)

  • ده مقال اتنشر فى موقع The Intercept   الشهير عن نفس الموضوع بعنوان : تسمم التيفلون دوبونت وكيمياء الخداع :

The Teflon Toxin: DuPont and the Chemistry of Deception (theintercept.com)

  • ده مقال تم نشره فى جريدة اليوم السابع المصريه بيشير وبيحظر من استخدام اوانى التيفال المكشوط تيفالها فى الطهى

لو بتطبخى فى الحلل التيفال..8 نصائح عشان تحمى عيلتك من أخطارها – اليوم السابع (youm7.com)

ياريت تتفرجوا على الفيلم لانه بيلخص الحكايه بامتياز وتشوفوا كفاح المحامى وتقولونا رايكم

ربنا يحمى  صحة الجميع

تحياتنا ليكم من صحى جدا


Leave a comment